Ayxan Abbasov: "Mövsümün ikinci yarısına tam hazır deyilik"

"Mövsümün ikinci yarısına tam hazır deyilik".

"QELEBE.AZ"un məlumatına görə, bunu "Turan Tovuz"un baş məşqçisi Ayxan Abbasov Türkiyənin Antalya şəhərindəki təlim məşq toplanışında Qazaxıstanın "Jetısu" klubuna 2:0 hesabı ilə qalib gəldikləri yoxlama oyunundan sonra PFL-in rəsmi yutub kanalına açıqlamasında deyib.

Türkiyənin Antalya şəhərində keçirdikləri təlim-məşq toplanışını dəyərləndirən 42 yaşlı mütəxəssis bildirib ki, kiçik zədələrdən sonra oyunlarda ağırlıq hiss olunurdu: "İnanıram ki, çempionatdakı iki turdan sonra hər şey qaydasına düşəcək. Adətən fasilədən sonra ilk matçlar çətin olur. Komandada rəqabət var. Bu, bizi sevindirir. Getdikcə daha yaxşı oynayacağıq".

Abbasovun sözlərinə görə, budəfəki hazırlıq prosesi qısa olsa da, toplanışdan maksimum istifadə ediblər: "Çalışdıq ki, futbolçular yenidən əvvəlki tempə öyrəşsinlər. İlk yoxlama matçımız çətin keçdi. Bəzi futbolçulara bir az çox istirahət vermişdik. İlk maçda oynamadılar. Amma vaxt keçdikcə istədiyimiz tempə çata bildik. Bu gün bəzi oyunçularımız 90 dəqiqə meydanda qaldı. Bu da normaldır. Gələn həftə bizi "Qarabağ"la ağır oyun gözləyir. Digər oyunçularımızı dünən ikitərəfli matçda sınamışdıq. Yalnız Cavid Tağıyevin yüngül zədəsi var. Ümumi götürsək, futbolçularımızdan istədiyimiz nəticələri ala bildik".

O, yeni transfer Denis Marandiçin çıxışına da toxunub: "Əzmkarlığı xoşumuza gəlir. Əvvəlki klubunda az oynadığı üçün futbol üçün darıxıb. Ona inanırıq. Ən xoş olan odur ki, qısa zamanda kollektivə uyğunlaşdı. Oyun planında bu sistemdə çıxış etmək Marandiçə yad deyil. Milli komandada bu sistemdə oynayıb. Məncə, yoxlama görüşlərində pis təsir bağışlamadı. Amma çempionat oyunların ona bir az ağır olacaq. 1-2 turdan sonra ideal formasına düşəcək".