Azərbaycan millisinin baş məşqçisi: Standart vəziyyətlərdən və qapıçı səhvlərindən qollar buraxdıq

Standart vəziyyətlərdən və qapıçı səhvlərindən qollar buraxdıq.

Bunu “QELEBE.AZ”a açıqlamasında 17 yaşadək qadın futbolçulardan ibarət Azərbaycan millisinin baş məşqçisi Nərgiz Qurbanova Avropa çempionatının seçmə mərhələsinin 2-ci raundu çərçivəsində B Liqasının 2-ci qrupunda keçirilən qarşılaşmalar barədə danışarkən deyib.

Mütəxəssis Azərbaycan millisinin ilk 2 oyundakı məğlubiyyətlərini şərh edib: “İlk oyunumuz Bolqarıstana qarşı oldu. Böyük hesabla uduzduq. Nəzərə alsaq ki, Bolqarıstan millisi A Liqasından B Liqasına düşüb, ordan gələn millilərlə oynamaq bizim üçün çox çətin olur. Üstəlik, Bolqarıstana oyundan 1 gün öncə gəldik. 6 qol buraxmağımızın, nəticənin belə olmasının yol yorğunluğundan irəli gəldiyini düşünürəm. Hesab daha fərqli ola bilərdi. Bolqarıstanın təcrübəli olması sözünü dedi. Sloveniya isə qrupun aşkar favoritidi. Heyətlərində təcrübəli, texniki cəhətdən güclü oyunçular var. Ümumiyyətlə, Bolqarıstan və Sloveniya kimi yığmalara qarşı oyunlar Azərbaycanın qadın futbolçuları üçün çox çətin keçir. Burada təcrübə amili də böyük rol oynayır".

Nərgiz Qurbanova turnirdə son matçı qələbə ilə başa vurmaq istədiklərini diqqətə çatdırıb: “Son oyun Moldova millisinə qarşı olacaq. Əsas məqsədimiz 3 xal qazanmaqdır. Futbolçularımız qalibiyyət üçün əllərindən gələni edəcəklər”.

Qeyd edək ki, Azərbaycan millisi Avropa çempionatının seçmə mərhələsinin 2-ci raundu çərçivəsində B liqasının 2-ci qrupunda Bolqarıstana 1:6, Sloveniyaya 0:4 hesabı ilə uduzub. Yığmamız sabah son görüşündə Moldova ilə qarşılaşacaq.