Azərbaycan millisinin baş məşqçisi: Rahatlaşmaq olmaz, hədəf Avropa və dünya çempionatıdır

Rahatlaşmaq olmaz, çünki hədəf Avropa və dünya çempionatıdır.

Bunu "QELEBE.AZ"a açıqlamasında yeniyetmə qızlardan ibarət Azərbaycan millisinin baş məşqçisi Elnur İsmayılov Türkiyənin Antalya şəhərində keçirilmiş cüdo üzrə Avropa Kuboku ilə bağlı danışarkən deyib.

Mütəxəssis yarışın yüksək səviyyədə təşkil olunduğunu bildirib: "Qızlardan ibarət yığmanın 18 üzvü bu turnirdə ölkəni təmsil edirdi. Ümumi komanda hesabında medalların əyarına və sayına görə birinci olduq. Qızlar da burada yaxşı nailiyyətlər əldə etdilər, 2 qızıl, 3 gümüş və 3 bürünc mükafat qazandılar. Onlardan beşinin finala vəsiqə qazanması yaxşı göstəricidir".

Baş məşqçi Avropa Kubokundan əvvəl Bakıda Azərbaycan Cüdo Federasiyasının yeni təlim-məşq mərkəzində hazırlıq prosesinin təşkil olunduğunu söyləyib: "Yaradılan yüksək şərait və diqqət bəhrəsini verir. Hər bir məşqçi yarışa yollananda hədəf medal qazanmaq olur. Amma mükafatdan başqa, səhvləri üzə çıxarmaq və onları düzəltmək də vacibdir. Bu turnirlərdə məqsədimiz qızların potensialını maksimum üzə çıxartmaq və səhvləri aradan qaldırmaq idi".

İsmayılov idmançıların çıxışından razı qaldığını vurğulayıb: "Avropa və dünya çempionatlarında medallarla bağlı öncədən bir şey demək istəmirəm. Fikir versəniz, son illər qızlarda nəticələr artıb. Bu, sağlam rəqabətin, məşq sisteminin düzgün olması və federasiyanın qızlara diqqətindən irəli gəlir".

Qeyd edək ki, Azərbaycan cüdoçuları turnirdə 4 qızıl, 5 gümüş və 7 bürünc medal əldə ediblər. Milli yarışda medal əyarına görə ümumi hesabda 1-ci, qızlar və oğlanlar arasında ikinci yeri tutub.