“Mingəçevir” yox olmaq təhlükəsi ilə üz-üzə – Komandanın taleyi necə olacaq?

Azərbaycan futbolunda maliyyə problemləri yenidən gündəmə gəlib. Bu dəfə təhlükə ilə üz-üzə qalan klub I Liqa təmsilçisi “Mingəçevir”dir. Komandanın üzləşdiyi çətinliklər artıq təkcə futbolçuların maaşlarının gecikməsi ilə məhdudlaşmır. Məsələ o həddə çatıb ki, klubun çempionatdakı gələcək taleyi sual altındadır.

“Mingəçevir”in Azərbaycan I Liqasını vaxtından əvvəl tərk etmək təhlükəsi yaranıb. Komanda VII turda “Şahdağ Qusar”la qarşılaşmaya çıxmayıb. Buna səbəb futbolçuların maaşlarının ödənilməməsi olub. Nəticədə “Mingəçevir”ə texniki məğlubiyyət verilib. Lakin bu, klubun üzləşdiyi problemlərin yalnız görünən tərəfidir.

Əsl təhlükə bundan sonra başlayır. Peşəkar Futbol Liqasının əsasnaməsinə görə, eyni yarışda iki qarşılaşmaya çıxmayan komanda çempionatdan kənarlaşdırılır. Bu isə o deməkdir ki, “Mingəçevir” daha bir oyunu buraxacağı təqdirdə, I Liqadakı mübarizəsini vaxtından əvvəl başa vurmaq məcburiyyətində qalacaq.

Üstəlik, belə bir vəziyyətdə komanda sadəcə aşağı liqaya düşməklə kifayətlənməyəcək. Əsasnamədə yazılır ki, çempionatdan kənarlaşdırılan komanda II Liqada da iştirak edə bilməz və üç il müddətinə bütün yarışlardan uzaqlaşdırılmalıdır. Bu isə klubun peşəkar futboldakı fəaliyyətinin uzunmüddətli dayanması deməkdir.

Məsələnin digər tərəfi mümkün kənarlaşdırılmanın çempionatın taleyinə təsiridir. Belə bir ssenari reallaşarsa, mövsümün sonunda I Liqanı iki komanda tərk edəcək. Bunlardan biri turnir cədvəlini sonuncu pillədə başa vuran kollektiv, digəri isə yarışdan kənarlaşdırılan “Mingəçevir” olacaq.

Bu halda II Liqadan iki komandanın I Liqaya yüksəlməsi nəzərdə tutulur. Nəticədə liqalar arasında keçirilməsi planlaşdırılan pley-off qarşılaşmasına ehtiyac qalmayacaq. Başqa sözlə, bir klubun maliyyə böhranı təkcə öz gələcəyini deyil, digər komandaların mövsüm sonundakı taleyini də dəyişə bilər.

Klubda vəziyyət hələ də ürəkaçan deyil. Maliyyə problemləri həllini tapmayıb və komandanın fəaliyyətini normal şəkildə davam etdirməsi üçün əlavə vəsaitə ehtiyac var.

Klubdan “Apasport”a verilən məlumatda bildirilib ki, yaranmış vəziyyətdən çıxış yolu tapmaq məqsədilə sponsor və potensial tərəfdaşlarla müxtəlif görüşlər keçirilir. Rəhbərlik maliyyə dəstəyi əldə etmək və komandanın fəaliyyətini davam etdirmək üçün imkanları dəyərləndirir.

Hazırda əsas məsələ yığılan borcların bağlanmasıdır. Bunun üçün konkret maliyyə dəstəyi göstərəcək şəxs və ya sponsorun ortaya çıxması vacibdir. Klub rəhbərliyi problemin həlli istiqamətində səylərini davam etdirsə də, hələlik vəziyyətin tam sabitləşdiyini söyləmək mümkün deyil.

Burada söhbət yalnız bir neçə futbolçunun maaşından və ya bir oyunun keçirilməsindən getmir. Məsələ bütövlükdə bir futbol klubunun gələcəyidir. Özü də konkret futbol şəhəri olan Mingəçevirin komandasının gələcəyi. 
İndi “Mingəçevir” üçün hər növbəti oyun xüsusi əhəmiyyət daşıyır. Komandanın meydana çıxması təkcə növbəti üç xal uğrunda mübarizə deyil, həm də çempionatda qalmaq üçün vacib şərtdir.

Klub rəhbərliyi sponsor taparaq borcları bağlaya bilsə, komandanın fəaliyyətini davam etdirməsi üçün imkan yaranacaq. Əks halda, Azərbaycan futbolu mövsümün ortasında daha bir klubun yarışla vidalaşmasına şahidlik edə bilər.