Azərbaycana dağ xizəyi üzrə beynəlxalq yarışların keçirilməsi hüququ verilib
https://qelebe.az//uploads/photo/azerbaycana-dag-xizeyi-uzre-beynelxalq-yarishlarin-kechirilmesi-huququ-verilib.webp
“Şahdağ” Turizm Mərkəzinə Beynəlxalq Xizək Federasiyası (FIS) tərəfindən homologasiya (yoxlanışdan keçmə) sertifikatı təqdim edilib.
Bu barədə "QELEBE.AZ"a Qış İdman Növləri Federasiyasından məlumat verilib.
Bildirilib ki, “Şahdağ” Turizm Mərkəzində aparılan yamacların homoloqasiya prosesi başa çatıb. Prosedurlar FIS tərəfindən təyin edilən ekspertlərin vasitəsilə həyata keçirilib.
Sertifikata əsasən "Şahdağ" Turizm Mərkəzinə Dağ Xizəyinin slalom, qiqant slalom və super G növü üzrə beynəlxalq yarışların keçirilməsi hüququ verilir.
Eyni zamanda, “Şahdağ” Turizm Mərkəzi beynəlxalq yarışların keçirilməsi üçün Beynəlxalq Xizək Federasiyasının yarış təqviminə əlavə edilməsi imkanı yaradır.
Qeyd edək ki, homoloqasiya xizək və snoubord üzrə idmançıların ən yüksək səviyyələrdə çıxış edə biləcəyi məkanların inkişafının vacib aspekti hesab edilir. FIS yarışlarının keçirildiyi bütün yamacların homologasiyadan keçirilməsi vacib amil olaraq qəbul edilir.
