Elektron İdman Növləri Federasiyası ölkə çempionatının qaliblərini mükafatlandırıb

Azərbaycan Elektron İdman Növləri Federasiyası kompüter oyunları üzrə XVII ölkə çempionatının qaliblərinin mükafatlandırma mərasimini keçirib.

Qurumdan "QELEBE.AZ"a verilən məlumata görə, tədbirdə çıxış edən Gənclər və İdman Nazirliyinin İdman şöbəsinin müdiri Elnur Məmmədov bu növün Azərbaycanda inkişafından söz açıb, oyunçuların ölkəni beynəlxalq arenada yüksək səviyyədə təmsil etdiyini vurğulayıb.

Qalibləri təbrik edən E.Məmmədov beynəlxalq yarışlarda idmançılara uğurlar arzulayıb.

Federasiyanın prezidenti Adil Mahmudov XVII Azərbaycan çempionatının 6 elektron idman növü üzrə keçirildiyini deyib: "Bunlardan 2-si solo, digərləri isə komanda idman növləridir. Solo yarışların qalibləri iyunda Polşada təşkil olunacaq Avropa çempionatında iştirak hüququ qazanıblar. Həmin idmançılar cari ildə Rumıniyada keçiriləcək dünya çempionatına da qatılacaqlar. Komanda yarışlarının qalibləri isə Avropa çempionatının seçmə mərhələsində mübarizə aparacaqlar".

Mahmudov elektron idman növlərinə marağın böyük olduğunu söyləyib: "Hazırda Bakı ilə yanaşı, regionlarda da klublar fəaliyyət göstərir. Əsas məqsəd idmanın bu növü üzrə liqaların yaradılmasıdır".

Daha sonra milli komanda üçün hazırlanmış forma ictimaiyyətə təqdim olunub. Forma ilk olaraq ölkəni Avropa çempionatında təmsil edəcək solo kiber idman növləri üzrə Azərbaycan çempionları Orxan Tağıyevlə Təbriz Mahmudova təqdim edilib.

Sonda qaliblərə medallar, diplom və pul mükafatı verilib.