Dünya çempionatı: Azərbaycan təmsilçiləri heç-heçə ediblər

İtaliyanın Sardiniya adasında gənclər arasında dünya çempionatı davam edir.

"Report"un məlumatına görə, qızların yarışında Azərbaycan şahmatçısı Gövhər Beydullayeva X turda sloveniyalı Urh Zala ilə qarşılaşıb. Ağ fiqurlarla oynayan 19 yaşlı şahmatçı 30-cu gedişdə sülhə razılaşıb.

Bu nəticə ilə xallarının sayını 8,5-ə yüksəldən Beydullayeva liderliyini davam etdirir. İkinci pillədə ondan bir xal geri qalan Qazaxıstan təmsilçisi Assel Serikbay qərarlaşıb. Zala isə 7 xalla üçüncüdür.

Abdullayevaya çempion olmaq üçün son turda heç-heçə də kifayət edəcək.

Oğlanların yarışında isə Abdulla Qədimbəyli macarıstanlı Adam Kozakla üz-üzə gəlib.

Yarışın lideri ilə görüşdən sülhlə ayrılan Azərbaycan təmsilçisi 10 turdan sonra 7,5 xalla ikinci pillədə qərarlaşıb. Kozakın isə 8 xalı var.

Qeyd edək ki, İsveçrə sistemi ilə keçirilən turnir 11 turdan ibarətdir. Yarışa oktyabrın 22-də yekun vurulacaq.