Azərbaycanın MMA döyüşçüsü: “Rəqibimin qeyri-adi gücü yoxdur”

“Rəqibimin qeyri-adi gücü yoxdur”.

“Report”un məlumatına görə, bunu Azərbaycanın MMA idmançısı Tural Rəhimov “Rizin” Döyüş Federasiyasının Bakıda təşkil edəcəyi “Landmark 7” turniri ərəfəsində mətbuat konfransında deyib.

35 yaşlı döyüşçü cənubi koreyalı Kyun Pyu Kimlə keçirəcəyi görüşlə bağlı fikirlərini bildirib: “Hazırlığımızı tam bitirmişik. Birinci mərhələni Azərbaycanda, ikinci mərhələni ABŞ-da keçirdik. Son olaraq ölkəmizdə taktiki hazırlıq keçdik. Son mərhələdə çəki salmaqla məşğul olduq”.

Karatenin kyokuşinkay növü üzrə Dünya Kubokunun qalibi olan idmançı Kyun Pyu Kimlə döyüşdə yalnız qələbə barədə düşündüyünü söyləyib: “Rəqibim eyni üslubda çıxış edir. Məndən cüssəli ola bilər. Ancaq bu heç nəyi dəyişmir. “Rizin”də ilk dəfə vuruşacağam. Kyun Pyu Kimi tanımırdım. Düşünürəm ki, ondan da güclüləri ilə görüşmüşəm. Döyüş neçə raund davam edir-etsin, əsas odur ki, sonda mənim əlimi havaya qaldırsınlar. Sonluğu da rəqibin yerə uzanması və əlimin havada olması kimi təsəvvür edirəm”.

O, doğma publika önündə çıxış etməyin vəziyyəti çətinləşdirdiyi qənaətindədir: “Vətənimdə qələbə qazanmağa hazıram. Çoxları düşünür ki, "doğma divarlar" kömək edir. Ancaq öz ölkəndə vuruşmaq böyük məsuliyyət tələb edir. Başqa ölkədə özünü publikaya göstərməyə çalışırsan. Burada isə təzyiq olur, əzizlərin, yaxınların canlı izləyir. Hətta bir zərbə də buraxmaq istəmirsən”.

Üçqat dünya çempionu MMA-ya keçməsinin səbəbini də izah edib: “Uşaq vaxtı əvvəlcə cüdo ilə məşğul olmuşam. Sonra karateyə keçdim. Kyokuşinkay üzrə dünya və Avropa çempionatında mükafatçı olmuşam. Ancaq sonra gördüm ki, heç bir yenilik yoxdur. Bir müddət həvəskar kimi vuruşduqdan sonra MMA-da peşəkar kimi döyüşdüm”.

Tural Rəhimov özünü universal adlandırıb: “İstədiyim vaxt güləşirəm, istədiyim vaxt ayaq üstə döyüşürəm. Bunlar rəqibdən asılı olur. Onu əlavə edə bilərəm ki, 66 kq çəkidə yeni döyüşçü gəlir. Gözləyin, yaxşı olacaq”.

Qeyd edək ki, Tural Rəhimovla Kyun Pyu Kim arasında döyüş noyabrın 4-də Milli Gimnastika Arenasında keçiriləcək.