Polşa millisinin baş məşqçisi: "Azərbaycan cüdo ölkəsidir"

"Azərbaycan cüdo ölkəsidir, dünyada öz sözünü deyib. Azərbaycan, Gürcüstan, Niderland, İsrail güclü ölkələrdir. Polşa da bu ölkələrin arasındadır".

Bunu "QELEBE.AZ"un Qərb bürosuna açıqlamasında Polşanın cüdo millisinin baş məşqçisi Rəşad Həsənov Göygöl Olimpiya Kompleksindəki beynəlxalq təlim-məşq toplanışı barədə danışarkən deyib.

Azərbaycanlı məşqçi 6 - 13 oktyabrda Özbəkistanın paytaxtı Daşkənddə keçiriləcək dünya çempionatı ərəfəsində çox gözəl hazırlıq prosesi keçdiklərini bildirib: "Bu təlim-məşq toplanışını təşkil edən insanlara təşəkkürümü bildirmək istəyirəm. Bizim üçün də çox xoşdur ki, Azərbaycan – Polşa əlaqələrini bu toplanış sayəsində möhkəmləndiririk. Biz də dünya çempionatına hazırlaşırıq. Bura 6 idmançı ilə qatılmışıq. Bunlardan 5-i mundialda təmsil olunacaq. Dünya çempionatı elə yarışdır ki, orada zəif rəqib olmur. Hamı medal qazanmaq üçün mübarizə aparır".

Həsənovun sözlərinə görə, Azərbaycandakı hazırlıq texniki-taktiki yöndədir: "Bundan əvvəl Azərbaycan millisi Polşada uzunmüddətli toplanışda idi. İyulun 28-dən avqustun 18-dək birgə hazırlıq keçmişik. Polşada fiziki hazırlığa, burada isə taktiki-texniki hazırlıqlara üstünlük verildi. Artıq Polşa millisinin nəticələrində də irəliləyiş hiss olunur".