UEFA İspaniya klubunu Konfrans Liqasında iştirakdan məhrum edib

UEFA “Osasuna”nın 2023/2024-cü illər mövsümündə Konfrans Liqasında iştirakını dayandırıb.

APA xəbər verir ki, bu barədə cümə günü “Osasuna”nın mətbuat xidməti məlumat yayıb.

Mövsümün sonunda “Osasuna” İspaniya çempionatının turnir cədvəlində yeddinci yeri tutaraq, Konfrans Liqasında oynamaq hüququ qazanıb. İyunun 7-də “Mundo Deportivo” qəzeti UEFA-nın “Osasuna”ya qarşı 2012/2013-cü və 2013/2014-cü illər mövsümlərində danışılmış oyunlarda iştirak etdiyinə görə iş açdığını yazıb. Klubun prezidenti də daxil olmaqla, İdarə heyətinin üzvləri mənimsəmə, sənədlərin saxtalaşdırılması və korrupsiya ilə bağlı cinayətlərdə ittiham olunur.

Klubun mətbuat xidməti UEFA-nın qərarı ilə razılaşmadıqlarını və cəzanın qaldırılması üçün etiraz edəcəklərini bildiriblər.