“Şamaxı”nın hücumçusu: “Canni De Byazidən dəvət gözləyirəm”

“Millinin baş məşqçisi Canni De Byazidən dəvət gözləyirəm”.

Bunu “Report”a açıqlamasında “Şamaxı”nın futbolçusu Amil Yunanov deyib.

Qış fasiləsindən sonra Premyer Liqada keçirdiyi 7 oyunda 4 qol vuran 30 yaşlı hücumçu zədədən sonra artıq əvvəlki formasına qovuşduğunu və qarşıdakı matçlarda milliyə kömək etməyə hazır olduğunu söyləyib: “Qış təlim-məşq toplanışında bərpa prosesi keçdim. Bunun üstündən artıq iki aya yaxın vaxt ötüb. Özümü millidə oynamağa hazır sayıram. Yığmada yer almaq şərəfdir. Əlbəttə ki, qarşıdakı oyunlarda heyətdə yer almaq istəyərəm. Dəvət gəlməsə belə, irəli baxacağam”.

O, millinin martın 24-də Avstriya və 27-də İsveçə qarşı səfərdə keçirəcəyi AVRO-2024-ün seçmə mərhələsi matçlarındakı şanslarını dəyərləndirib: “Hər iki rəqib yaxşı futbolu olan ölkənin təmsilçisidir. Həm Avstriya, həm də İsveç iddialı komandalardır. Bizi çox çətin oyunlar gözləyir. Ancaq onu da nəzərə alaq ki, yığmamız son 5 matçda qələbə qazanıb. Bu, motivasiya baxımından çox yaxşı amildir. Qarşıdakı görüşlərdən yaxşı nəticələr gözləyirəm”.

Yunanov güclü rəqibləri əzmkarlıq sayəsində büdrətməyin mümkün olduğunu vurğulayıb: “İnanıram ki, millimiz qələbə seriyasını Avstriya və İsveç önündə də davam etdirəcək. Ola bilsin ki, bizi özlərinə əsas rəqib qismində görmürlər. Onları yanılda bilərik. Bizim əsas üstün cəhətimiz əzmkarlıqdır. Bunu göstərə bilsək, qarşıdakı oyunlarda da uğurlu nəticə qazanarıq”.

Qeyd edək ki, Amil Yunanov sonuncu dəfə 2021-ci ilin martında Qətərlə (1:2) keçirilən yoldaşlıq görüşündə Azərbaycan millisinin formasını geyinib. O, yığmada ümumilikdə 5 oyun keçirib.