“Qarabağ” UEFA Konfrans Liqasında mübarizəni dayandırıb - YENİLƏNİB-3

“Qarabağ” klubu UEFA Konfrans Liqasında mübarizəni dayandırıb.

APA xəbər verir ki, onaltıdabir finalda Belçikanın “Gent” klubu ilə qarşılaşan “Köhlən atlar” səfərdə rəqibinə 0:1 hesabı ilə məğlub olub. ilk oyunda “Qarabağ” eyni hesabla qalib gəldiyindən, oyunda əlavə vaxt oynanılıb. İki əlavə vaxtda da hesab açılmayıb.

Oyundan sonra təyin olunan penalti zərbələrində daha dəqiq oynayan “Gent” futbolçuları 5:3 hesabı ilə qalib gələrək növbəti mərhələyə yüksəliblər.

****

02.00

“Gent”-“Qarabağ” oyunun əsas vaxtı 1:0 hesabı ilə meydan sahiblərinin xeyrinə başa çatıb.

APA xəbər verir ki, ilk oyunda “Qarabağ” eyni hesabla qalib gəldiyindən, əlavə vaxt oynanılır.

***

01.32

"Gent" - "Qarabağ" oyununda hesab açılıb.

APA xəbər verir ki, 75-ci dəqiqədə meydan sahiblərinin futbolçusu Villiu Orban komandasını önə çıxarıb.

***

00.01

UEFA Konfrans Liqasının pley-off mərhələsində keçirilən “Gent”-“Qarabağ” matçı start götürüb.

APA xəbər verir ki, “Qarabağ”ın heyətində meydana Luka Quqeşaşvili, Julio Romao, Musa Qurbanlı, Abdullah Zubir, Bəhlul Mustafazadə, Leandro Andrade, Riçard Almeyda, Marko Veşoviç, Elvin Cəfərquliyev, Bədavi Hüseynov və Ramil Şeydayev çıxıblar.

“Gent"in heyətində isə Deyvi Rof, Mişel Nqadye-Nqacui, Xönseok Xon, Uqo Kuypers, Jülyen De Sart, Alessio Kastro-Montes, Cordan Torunariqa, Sven Kums, Nurio Fortuna, Loran Depuatr, Bruno Qodo yer alıblar.

Gent şəhərindəki "Gelamko Arena"da keçirilən matçı şotlandiyalı FIFA referisi Uilyam Kollam idarə edir.

Bakıda rəqibinə 1:0 hesabı ilə qalib gələn Ağdam klubu Gentin eyniadlı stadionuna tarix yazmaq üçün çıxıb. Avrokuboklarda 1/8 finala adlayan ilk Azərbaycan klubu olmaq üçün “Qarabağ” ilk görüşdəki üstünlüyü qorumalı, ən pis halda isə penaltilərlə qalib gəlməlidir.