Avropa çempionatında medal qazanan Azərbaycan cüdoçusu mundialda da uğurlu çıxış etmək istəyir

Monteneqronun paytaxtı Podqoritsada keçirilən Avropa çempionatında bürünc medal qazanan Azərbaycan cüdoçusu Rəşid Məmmədəliyev (73 kq) dünya çempionatında da uğurlu çıxış etmək istəyir.

25 yaşlı idmançı bu barədə "QELEBE.AZ"a açıqlamasında bildirib.

O, Podqoritsadakı yarışla bağlı təəssüratlarını bölüşüb:

"Turnirin ab-havası çox gözəl idi. Komandada yaxşı əhval-ruhiyyə var. Məşqçilərin, tibbi heyətin, komanda yoldaşlarımın dəstəyi mənə çox kömək etdi. Yarışa yollanacağımı son anda bildim. Turnirdən həzz almaq istəyirdim. Fikirləşdim ki, itirəcəyim bir şey yoxdur. Bu da məni stressdən azad etdi, rahatlıq verdi".

Hidayət Heydərovun əvəzinə Monteneqroya yollanan cüdoçu dünya çempionatında da mübarizə aparmaq istədiyini vurğulayıb:

"İyunda mundialda da şans qazanacağımı gözləyirəm. Özümə inanmasam, bu işə davam etmərəm".

Qeyd edək ki, Rəşid Məmmədəliyev xəstələndiyinə görə millinin heyətindən çıxarılan Olimpiya çempionu Hidayət Heydərovun əvəzinə Avropa çempionatına qatılmışdı.