Mahmud Qurbanov Azərbaycan Kubokunun yarımfinalında qarşılaşacaq komandaların şanslarını dəyərləndirib

Azərbaycan millisinin sabiq məşqçisi Mahmud Qurbanov bu gün baş tutacaq ölkə kubokunun yarımfinal mərhələsinin ilk matçlarında üz-üzə gələcək komandaların şanslarını dəyərləndirib.

51 yaşlı mütəxəssis bu barədə “QELEBE.AZ”a açıqlama verib.

O, oyunların gərgin keçəcəyini söyləyib:

“Qarbağ” çempionatın liderdir, yəqin ki, çempionluğu qeyd edəcək. Amma kuboku qazanmaqla “qızıl dubl”a imza atmaq istəyəcək. “Araz-Naxçıvan” Premyer Liqada üçüncü yeri tutmağa əsas namizəddir. Buna baxmayaraq, kuboku qazanmaq istədikləri görünür. Elmar Baxşıyev “Qəbələ”də çalışanda “Qarabağ”ı yarımfinalda məğlub etmişdi. Finalda isə, səhv etmirəmsə, “Neftçi”ni üstələmişdi. Yenə də “Qarabağ”ı favorit görürəm. Finalın bir addımlığı olduğu üçün oyunlar gərgin keçəcək. Futbolda hər şey mümkündür. Təbii ki, hər kəs kuboku qazanmaq istəyər, çünki tarixdir”.

M.Qurbanov “Neftçi” - “Sabah” matçında isə favorit görmədiyini vurğulayıb:

“Kubokla bağlı proqnoz vermək çətindir. 4 klubdan ikisinin - “Araz-Naxçıvan” və “Qarabağ”ın avrokuboklara vəsiqə qazanmaq şansları çoxdur. Xüsusən də “Qarabağ”ı vurğulamaq istərdim. “Neftçi” və “Sabah” isə ancaq kuboku əldə etməklə avrokuboklara vəsiqə qazana bilərlər. Çünki hazırda çempionatda sabit və uğurlu nəticələri yoxdur. “Neftçi” - “Sabah” matçının favoriti yoxdur. Hər iki komandanın finala çıxmaq şansları eynidir. Bununla yanaşı, yəqin ki, zədəli oyunçuları, heyətlə bağlı problemləri var. Uğursuzluqları sığortalamaq üçün ən azı finala çıxmalıdırlar. Düşünürəm ki, həm “Neftçi”, həm də “Sabah” üçün ən əsas məqsəd finala çıxmaqdır”.

Qeyd edək ki, “Araz-Naxçıvan” – “Qarabağ” matçı saat 17:00-da, “Neftçi” – “Sabah” görüşü isə 19:30-da start götürəcək.