Rusiyalı mütəxəssis Azərbaycan futbolunun çatışmazlıqlarından danışıb

"Sabah"ın baş məşqçisi Murad Musayev Azərbaycan futbolunun çatışmazlıqlarını açıqlayıb.

"QELEBE.AZ"un məlumatına görə, 40 yaşlı mütəxəssis "Match TV"yə müsahibəsində infrastruktur və azarkeş amilini qabardıb.

O, Azərbaycan Premyer Liqası ilə müqayisədə Rusiyada çempionatın səviyyəsinin daha yuxarı olduğunu bildirib: "Tamaşaçı sayında da fərq nəzərə çarpır. Həm də Rusiyanın daha yaxşı infrastrukturu var, dünya çempionatından sonra yaxşı stadionlar qalıb. Azərbaycanda isə bu, bir az zəifdir. Amma burada hər şey yaxşılığa doğru dəyişir. İnfrastruktur yaxşılaşır, matçlara daha çox azarkeş gəlir. Digər əsas fərq çempionatda 10 komandanın olmasıdır. Hansısa klubla kubokda qarşılaşsan, çempionat ərzində həmin kollektivə qarşı 6 dəfə oynaya bilərsən. Bu da yaxşı hal deyil".

Rusiyalı mütəxəssisin sözlərinə görə, "Sabah"a yeni gələndə çempionatda daha açıq matçlar olurdu: "İndi hamı bizə qarşı 5-6 müdafiəçi ilə çox yaxın oynamağa çalışır. Bu, sanki Rusiyada "Ufa" ilə oyunları xatırladır".

Musayev Azərbaycanda qazandığı təcrübədən məmnun olduğunu vurğulayıb: "Güclü komandaların və məşqçilərin toplaşdığı maraqlı çempionatdır. Hamı "Qarabağ"ı yaxşı tanıyır. Artıq 8 ildir avrokubokların qrup mərhələsində çıxış edirlər və ardıcıl ikinci dəfə pley-offa vəsiqə qazanıblar. Başqa maraqlı klublar da var. Bu təcrübəni yaşadığım, çağırışı qəbul etdiyim üçün şadam".

Komandasının avrokuboklara düşmək şanslarını da dəyərləndirən baş məşqçi bunları deyib: "Bəli, şansımız var. Amma qarşıda bizi hələ mövsümün ikinci yarısı gözləyir. İndi təlim-məşq toplanışında yaxşı işləmək və çempionatın qalan hissəsini də yüksək səviyyədə keçirmək vacibdir".