Azərbaycan millisinin baş məşqçisi: "Bu, U-19-un Avropa çempionatında ilk qələbəsi kimi tarixə düşdü"

Bu U-19-un Avropa çempionatında ilk qələbəsi kimi tarixə düşdü.

"Report" xəbər verir ki, bunu Azərbaycanın 19 yaşadək futzalçılardan ibarət millisinin baş məşqçisi İlqar Aslanov Futzal Federasiyasının mətbuat xidmətinə açıqlamasında Avropa çempionatının ilkin mərhələsində Kosovo ilə matçı (4:1) dəyərləndirərkən deyib.

Mütəxəssis bu qələbənin hələ mərhələ keçmək üçün kifayət etmədiyini bildirib:

"Bu U-19-un Avropa çempionatında ilk qələbəsi kimi tarixə düşdü. Buna görə də sevincliyik. Ancaq hələ ki işin yarısını görmüşük. Bu qələbə mərhələ adlamaq üçün kifayət etmir. Sabah bunun davamını gətirməliyik. İnanıram ki, komanda olaraq bu şansı əldən verməyəcəyik və qələbə qazanıb həm azarkeşlərimizi sevindirəcəyik, həm də əsas mərhələyə yüksələcəyik”.

O, oyunun başlanğıcında komandanın həyəcanlı olduğunu vurğulayıb:

“Oyun çətin məcrada keçdi. Matçın gedişində hesabda geri düşdük. Komanda çox həyəcanlı idi, çünki bu cür yarışda ilk dəfə iştirak edirdilər. Ancaq fasiləyə qədər hesabı bərabərləşdirdik. Paltardəyişmə otağında söhbət zamanı anladılar ki, bu rəqibi yenmək olar. Bunun da nəticəsi kimi ikinci hissədə özümüzdə güc tapdıq və qələbə qollarını vurduq. Futzal ailəsini təbrik edirəm".

Qeyd edək ki, U-19 yanvarın yanvarın 26-da San Marinonun müvafiq yaş qrupunundan ibarət yığması ilə qarşılaşacaq. Bu qrupun bütün oyunları San Marinoda keçiriləcək. Ancaq birinci yerin sahibi əsas mərhələyə vəsiqə qazanacaq. Əsas mərhələnin görüşləri isə martın 21-dən 26-dək keçiriləcək.