Rusiya millisinin keçmiş futbolçusu bir il ərzində 100 dəfə cərimələnib

Rusiya millisinin sabiq futbolçusu Artyom Dzyuba bir il ərzində 100 dəfə cərimələnib.

"Report" yerli mətbuata istinadən xəbər verir ki, hücumçuya sürət həddini aşmağa, yol xətlərinin qaydalarını pozmağa, təhlükəsizlik kəmərini taxmamağa və avtomobilini müəyyən edilmiş zolaqda sürməməyə görə protokollar tərtib edilib.

Nəticədə 2023-cü ilin oktyabrından bəri 35 yaşlı forvard 88 min rubl (1700 manatdan çox) cərimə ödəyib. Dzyuba ümumilikdə 300-dən çox cəriməyə məruz qalıb.

Qeyd edək ki, futbolçu sonuncu dəfə formasını geyindiyi "Lokomotiv" (Moskva) komandasından ayrıldıqdan sonra klubsuzdur. O, Rusiya millisinin heyətində meydana çıxdığı 55 oyunda 30 qolla yadda qalıb.