“Qarabağ”ın qapıçısı “Bayer 04”ə rəqib olmalarına sevinir

“Qarabağ”ın futbolçusu Andrey Lunyov UEFA Avropa Liqasının 1/8 final mərhələsində Almaniyanın “Bayer 04” klubuna rəqib olmalarına sevinir.

“Report” xəbər verir ki, bunu Rusiya millisinin qapıçılar üzrə məşqçisi Vitali Kafanov açıqlayıb.

O, püşkatmadan əvvəl 32 yaşlı qapıçı ilə bu barədə söhbət etdiyini bildirib: “Həmin vaxt mənə dedi ki, yenidən “Bayer 04”ə qarşı oynamaq istəyir. Düzdür, bu cütdə şansları azdır. Lakin futbolda hər hansı bir komanda istənilən rəqibi məğlub edə bilər. Onlar turnirin qrup mərhələsində qarşılaşmışdılar. Yəqin ki, “Qarabağ”ın məşqçiləri bəzi qeydlərini götürüblər”.

Qeyd edək ki, “Qarabağ”la “Bayer 04” arasında ilk oyun martın 7-də Bakıda, cavab görüşü isə 14-də Leverkuzendə keçiriləcək.