Ramil Şeydayevin Türkiyə klubuna qoşulacağı tarix müəyyənləşib

Azərbaycan millisinin futbolçusu Ramil Şeydayev yanvarın 17-də Türkiyənin “Kocaelispor” klubuna qoşulacaq.

“QELEBE.AZ”un yerli mətbuata istinadən məlumatına görə, son klubu Tailand təmsilçisi “Buriram Yunayted” olan 28 yaşlı hücumçu səhər saatlarında Kocaelidə olacaq.

O, tibbi müayinədən keçdikdən sonra TFF I Liqa təmsilçisi ilə rəsmi müqavilə imzalayacaq və kollektivlə ilk məşqinə çıxacaq. Şeydayevin sözləşmə müddəti 2025-ci ilin yayına qədər nəzərdə tutulub.

Ramil Şeydayev “Buriram Yunayted”in heyətində bütün turnirlərdə 16 oyunda 1 qol vurub, 4 məhsuldar ötürmə verib.

Qeyd edək ki, “Kocalispor” I Liqada 18 turdan sonra 33 xalla turnir cədvəlinin üçüncü pilləsində qərarlaşıb.