Firdovsi Umudov: "Qarabağda qazandığımız zəfərin davamını dünya çempionatında gətirməyə çalışacağıq"

"Qarabağda qazandığımız zəfərin davamını dünya çempionatında gətirməyə çalışacağıq".

"Report"un məlumatına görə, bu sözləri “Sərhədçi” Peşəkar İdman Klubunun prezidenti Firdovsi Umudov hərbçilər arasında keçiriləcək güləş üzrə 36-cı dünya çempionatı ilə bağlı jurnalistlərə açıqlamasında söyləyib.

Təcrübəli mütəxəssis Azərbaycanın dünyada idman ölkəsi kimi tanındığını vurğulayıb: "Ölkəmizdə bir çox mötəbər tədbirlər keçirilib. Hərbçilər arasında 36-cı dünya çempionatının təşkilatçılığı da bizə həvalə olunub. Cənab Prezident İlham Əliyev və Birinci vitse-prezident Mehriban Əliyeva tərəfindən idmana və idmançılara çox böyük diqqət və qayğı göstərilir. Biz də çalışacağıq ki, qarşıdan gələn dünya çempionatında bu etimadı doğruldaq, ölkəmizi layiqincə təmsil edək. Dövlət, Gənclər və İdman Nazirliyi və Dövlət Sərhəd Xidmətininin rəhbərliyi tərəfindən bu yarışın təşkili üçün yüksək səviyyədə şərait yaradılıb. Güləş bizim ata idman növümüzdür. Bütün azarkeşləri, güləşsevərləri yarışda idmançılarımıza dəstək verməyə dəvət edirəm".

Qeyd edək ki, hərbçilər arasında dünya çempionatı Dövlət Sərhəd Xidmətinin, həmçinin Gənclər və İdman Nazirliyinin təşkilatçılığı ilə 27 noyabr - 3 dekabr tarixlərində “Sərhədçi” İdman Mərkəzində keçiriləcək.