İtaliya və Türkiyə AVRO-2032-yə birgə ev sahibliyi üçün UEFA-ya müraciət edib

İtaliya Futbol Federasiyası (FIGC) və Türkiyə Futbol Federasiyası (TFF) UEFA AVRO-2032-yə birgə ev sahibliyi etmək üçün UEFA-ya müraciət göndərib.

APA xəbər verir ki, bu barədə UEFA-nın mətbuat xidməti məlumat yayıb.

Bildirilib ki, 2021-ci ildə UEFA 2028 və 2032-ci illərdə ardıcıl iki Avropa Çempionatına ev sahibliyi etmək üçün tender prosesi başladıb. TFF hər iki yarış üçün müraciət etsə də, FIGC yalnız 2032-ci ildə ev sahibliyi üçün təklif verib. 2028-ci ildə yarışa ev sahibliyi etmək üçün: İngiltərə, Şimali İrlandiya, İrlandiya Respublikası, Şotlandiya və Uels də birgə müraciət edib.

Qeyd olunub ki, UEFA indi FIGC və TFF ilə birgə onların birgə təklifi üçün təqdim olunacaq sənədlərin tender tələblərinə uyğun olmasını təmin etmək üçün işləyəcək.

Birgə təklif bu tələblərə cavab verərsə, 2028 və 2032-ci illər üçün təyinatların aparılacağı oktyabrın 10-da keçiriləcək iclasda UEFA İcraiyyə Komitəsinə təqdim ediləcək. Məkanlar və matçların təqvimi ilə bağlı qərarlar sonrakı mərhələdə veriləcək.