Həndbol üzrə Azərbaycan çempionatında təxirə salınmış oyunlar keçirilib

Kişi həndbolçuların Azərbaycan çempionatında təxirə salınmış iki turun oyunları keçirilib.

"QELEBE.AZ"un məlumatına görə, qarşılaşmalar "AHF Arena"da baş tutub.

VII turun "Təhsil" - "Məhsul" görüşü daha çox diqqət çəkib. Fasiləyə 1 top fərqi ilə üstün yollanan nominal meydan sahibləri 2-ci hissədə rəqibin ciddi müvqaviməti ilə üzləşiblər. Buna baxmayaraq, "Təhsil" matçı qələbə ilə başa vurub - 21:20. Bu komandaların VIII tura təsadüf edən qarşılaşmasında da "Təhsil" 17:16 hesablı qələbə qazanıb.

"Dinamo" U 16-nı hər iki turda məğlub edib. VII turda 54:22 hesabı ilə üstün olan "dinamoçular" digər görüşdə də böyük hesablı qələbəyə seviniblər - 60:32.

"Bakı" da hər iki turun oyununda rəqibinə qalib gəlib. Paytaxtın eyniadlı komandası RİOEUGİM kollektivi ilə oyunlarda müvafiq olaraq 37:24 və 30:18 hesablı qələbə qazanıb.

Hazırda "İdman Akademiyası" 54 xalla turnir cədvəlinə başçılıq edir. "Dinamo" ondan 6 xal geri qalır. "Təhsil" 42 xalla 3-cü, "Məhsul" 41 xalla 4-cü yerdədir. 19 xalı olan "Bakı" 5-ci pillədə qərarlaşıb. RİOEUGİM və U-16 6 xalla autsayderdir.