“Qarabağ”ın keçmiş futbolçusu: “Oyunun gedişində “Gent”in qol vuracağı gözlənilirdi”

“Qarabağ”la oyunun gedişində “Gent”in qol vuracağı gözlənilirdi”.

Bunu “QELEBE.AZ”a müsahibəsində “Qarabağ”ın sabiq futbolçusu Arif Əsədov Ağdam təmsilçisinin UEFA Konfrans Liqasının pley-off mərhələsində Belçika klubu “Gent”lə səfərdə keçirdiyi oyunla bağlı danışarkən deyib.

53 yaşlı mütəxəssis Azərbaycan çempionunun 0:1 hesabı ilə məğlub olmasını və penaltilər seriyasında (3:5) rəqibdən zəif çıxış edərək mübarizəni dayandırmasını fiziki durum və yeni transferlərlə əlaqələndirib: “Qarabağ”da fiziki cəhətdən hələ də müəyyən çatışmazlıq var. Yeni gələnlər, zədədən qayıdanlar var. Belçikadakı görüşün birinci hissəsində təmsilçimiz üstün idi. Amma getdikcə bunu əldən verməyə başladı. Xüsusən də, əvəzetmələrdən sonra disbalans yarandı. Rəqibin sonradan meydana daxil olan oyunçuları komandanı gücləndirdilər. “Qarabağ”da isə əvəzetmədən oyuna qoşulanlar əlavə güc qata bilmədilər”.

1999/2000 və 2003/2004 mövsümündə “Qarabağ”ın formasını geyinmiş Azərbaycan millisinin hazırkı məşqçisi penaltilər seriyasının bəxtdən asılı olduğunu düşünür: “Əlavə edilmiş vaxtda qol olmaması “Qarabağ” üçün əlverişli idi. Ancaq penaltilər seriyası artıq lotereyadır. Burada bəxt gətirmədi. “Gent”i üstələyərək, yeni tarix yazmaq olardı. Çünki “Gent” keçilməyəcək komanda deyildi”.

Arif Əsədovun müsahibəsinin tam versiyasını buradan oxuya bilərsiniz.