Azərbaycan millisinin sabiq məşqçisi: “Zirə” Xorvatiya klubu ilə matçda özünü yaxşı tərəfdən göstərdi”

“Zirə” UEFA Konfrans Liqasının II təsnifat mərhələsində üz-üzə gəldiyi “Hayduk”la (Xorvatiya) ilk matçda özünü yaxşı tərəfdən göstərib.

Bunu “Report”a açıqlamasında Azərbaycan millisinin sabiq məşqçisi Arif Əsədov deyib.

Mütəxəssis "Zirə"ninj baş məşqçisi Rəşad Sadıqov və köməkçilərinin Xorvatiya klubunu düzgün təhlil etdiyini vurğulayıb:

“Ən güclü rəqib məhz “Zirə”yə düşüb. Amma məşqçilərin rəqibi yaxşı təhlil etməsi və düzgün taktika seçməsi hər iki komandanın bərabər gücdə olduğunu göstərdi. Hətta bəzi məqamlarda “Zirə” rəqibini üstələyirdi. Çalışırdı meydanın rəqibə aid hissəsinə sıxışdırsın və daim təzyiq altında saxlasın. Halbuki “Zirə”nin oyunu daha çox əks-hücumlar üzərində quracağını gözləyirdim. Amma komanda daha inamlı oynadı, ilk qolu vurdu və daha çox fərqlənmək şansları oldu. “Hayduk”un da hücum futboluna üstünlük verməsi səbəbindən açıq oyun izlədik. Hər iki komanda üçün xüsusilə ikinci hissədə daha çox qol imkanları oldu. Görünən odur ki, “Zirə” rəqibin adından çəkinmədi. Məncə, ötən il UEFA Konfrans Liqasında Xorvatiyanın digər klubu “Osyek” üzərində qazanılan qələbə də burda rol oynadı. Sanki komandada Xorvatiya klublarını keçə biləcəyinə dair inam yaranıb. Bu, növbəti oyuna təsir göstərə bilər”.

A.Əsədov səfər matçında şansların bərabər olduğunu bildirib:

“Zirə”nin ötənilki oyununu da nəzərə alsaq, məncə, səfərdə şanslar bərabərdir. Hətta matçda əlavə dəqiqələr də oynanıla bilər. “Zirə”də fiziki baxımdan bir qədər boşluqlar var. Bunun da səbəbi məlumdur - komanda hələ optimal formada deyil. Taktiki baxımdan isə formalaşdığı hiss olunur. Çatışmazlıqlar yalnız fiziki durumla bağlıdır. Buna baxmayaraq, komandanın oyununda işıq göründüyü və beynəlxalq təcrübəsinin artdığı hiss edilir”.

Qeyd edək ki, Bakıdakı 8-ci km stadionunda baş tutan “Zirə” - “Hayduk” matçı 1:1 hesabı ilə yekunlaşıb. Komandalar arasında cavab matçı iyulun 30-da Xorvatiyada keçiriləcək.