Azərbaycanın güləş millisinin məşqçisi: "Son 4 ildə 3-cü dəfə Avropa çempionu olduq"

Son 4 ildə 3-cü dəfə Avropa çempionu olduq.

“Report” xəbər verir ki, bunu İtaliyada keçirilən yunan-Roma güləşi üzrə U-15 Avropa çempionatında birinci olan Azərbaycan millisinin böyük məşqçisi Əbülfət Məmmədov jurnalistlərə açıqlamasında deyib.

O, qeyd edib ki, millinin çempionatdakı çıxışından razıdır:

“Gənclərimiz yenə yaxşı çıxış etdilər. Rəqabət ildən-ilə daha da artır. Şükür Allaha, bütün komandaları üstələdik. Daha yaxşı ola bilərdi. Ancaq bu nəticələr də yaxşıdır”.

“Bu heyətdən gələn il bizim komandada qalan olacaq. Hüseyn Əmrahov və Xudayar Kərimov növbəti il də millidə qalacaqlar. Qalan bütün güləşçilərimiz dəyişəcək”, - Ə.Məmmədov qeyd edib.

Xatırladaq ki, 1 qızıl, 2 gümüş və 3 bürünc medal qazanan yunan-Roma güləşi üzrə Azərbaycan yığması 131 xalla birinci yeri tutub. Ermənistan (125 xal) ikinci, Gürcüstan (99 xal) isə üçüncü olub. Millinin heyətində Ömər Salmanov (44 kq) bütün rəqiblərinə qalib gələrək Avropa çempionu olub. Hüseyn Əmrahlı (38 kq) və Ruslan Nuriyev (75 kq) gümüş medala sahib çıxıblar. Xudayar Kərimli (38 kq), Hüseyn Mustafazadə (52 kq) və Nadir Həsənov (62 kq) isə bürünc medalı boynundan asıb.

Komanda 3-cü dəfə Avropa çempionu olub. Yunan-Roma güləşi millisi 2022 və 2024-cü illərdə də eyni uğura imza atıb.