Vasili Berezutski: "Yeganə mənfi cəhət odur ki, Moskvadakı oyunda zədə aldım"

"Sabah"ın rusiyalı baş məşqçisi Vasili Berezutski Moskvada ÇSKA-nın UEFA Kubokunda qələbəsinin 20-ci ildönümünə həsr olunmuş matç barədə fikirlərini bölüşüb.

Mütəxəssis "QELEBE.AZ"a açıqlamasında təəssüratlarının çox müsbət olduğunu bildirib:

"Hər şey çox peşəkar və maraqlı təşkil olunmuşdu. Belə oyunların keçirilməsi çox maraqlıdır. Çünki azarkeşlərlə görüşürsən, yəni onlarla bir araya gəlirsən və onlara 20 il əvvəlki qələbəni xatırladırsan. Üstəlik, həmin oyunda iştirak etmiş məşqçilərlə, futbolçularla da görüşürsən, bəzi anları birlikdə xatırlayırsınız. Bu, həm həyəcanverici, həm də maraqlıdır. Ən əsası isə bu elə bil məzunların görüşüdür – sən görürsən ki, futbolçular bu illər ərzində necə dəyişiblər. Səmimi desəm, həmin komandanı xatırlayanda, deyə bilərəm ki, onlar həm əla insan olmaqla yanaşı, həm də əsl idmançıdırlar. Onlara Rusiya futbolu tarixində ilk dəfə avrokubok qazanmaq nəsib oldu. Ona görə təəssüratlarım çox müsbətdir. Yeganə mənfi cəhət odur ki, zədə aldım. Amma hazırda hər şey qaydasındadır".

Qeyd edək ki, ÇSKA əfsanələri Moskvada təşkil olunan görüşdə Avropa klublarının veteran futbolçularından ibarət komandası ilə üz-üzə gəlib. Qarşılaşma Rusiya klubunun 5:1 hesablı qələbəsi ilə yekunlaşıb.