Göygöldə yeniyetmə cüdoçular arasında Avropa Kubokunun püşkatma mərasimi keçirilib

Göygöldə yeniyetmə cüdoçular arasında təşkil olunacaq Avropa Kubokunun püşkatma mərasimi keçirilib.

"Report" xəbər verir ki, püşkatmada Azərbaycan Cüdo Federasiyasının idman direktoru Kamran Talıbov, Avropa Cüdo Birliyinin (ACB) idman komissarı Albert Qmayner və ACB-nin hakim-komissarı Nano Karvalyo iştirak ediblər.

K.Talıbov Azərbaycanın cüdo üzrə zəngin ənənələrə malik olduğunu, artıq ikinci ildir ki, Göygöldə Avropa Kubokunun keçirildiyini qeyd edib: “Sevinirik ki, yarış Avropa təqviminə daxil edilib və yeniyetmə idmançılar belə turnirdə öz bacarıqlarını artıra bilərlər”.

A.Qmayner turnirin təşkilini yüksək qiymətləndirərək, Azərbaycanın hər zaman böyük yarışlara ev sahibliyi etməklə məşhur olduğunu qeyd edib. O, həmçinin qeyd edib ki, hər il Bakıda keçirilən "Böyük Dəbilqə" yarışlarına aparıcı cüdoçular gəlir.

“Göygöldə yeni gələcək ulduzlar parlaya bilər”, - deyə o vurğulayıb.

N.Karvalyo qeyd edib ki, Azərbaycan cüdoçuları həmişə yüksək ustalıqları ilə seçiliblər. O, cüdoçuların maraqlı mübarizə aparacaqlarına əmin olduğunu bildirib. “Mən tatamidə çətin döyüşlər gözləyirəm. Bütün iştirakçılara uğurlar arzulayıram”.

Qeyd edək ki, mayın 4-5-də baş tutacaq turnirdə 14 ölkədən 323 cüdoçu iştirak edəcək. Oğlanlar arasında 209, qızlar arasında isə 114 idmançı mübarizə aparacaq. Avropa Kubokunda Fransa, Serbiya, Gürcüstan, Sloveniya, Yunanıstan, İtaliya, Özbəkistan, Qırğızıstan, Türkiyə, Ukrayna, Qazaxıstan, Lüksemburq idmançıları, eləcə də fərdi bitərəf idmançılar iştirak edəcəklər.

Azərbaycan milli komandasının heyətində 140 cüdoçu (95 oğlan və 45 qız) yer alıb. Cüdoçularımız ötən il 7 qızıl, 5 gümüş və 9 bürünc medal qazanaraq komanda hesabında birinci yeri tutublar.