Azərbaycan millisinin baş məşqçisi: Təzyiqin öhdəsindən gələ bilmədik

Üzərimizdə olan təzyiqin öhdəsindən gələ bilmədik.

Bunu “Report”a açıqlamasında qılıncoynatma üzrə Azərbaycan millisinin baş məşqçisi Çingiz Mustafayev deyib.

O, yığma üzvlərinin Lüksemburqda keçirilmiş Avropa Olimpiya Təsnifat turnirindəki çıxışını dəyərləndirib: “Turnirdə iki qılıncoynadanla təmsil olunurduq. Kişi şpaqaçıların şəxsi yarışında Avropadan yeganə lisenziya uğrunda Ruslan Həsənov mübarizə aparırdı. Qrup mərhələsini uğurla başa vurub ilk pley-off görüşündən qələbə ilə ayrılsa da, turnirin gələcək finalçısı, Portuqaliya şpaqaçısına uduzdu. Hələ yarışdan öncə də şpaqada lisenziya qazanmaq şansımız böyük deyildi. Avropada kişi şpaqaçılar arasında böyük rəqabət var. Bu turnirdə sonuncu Yay Olimpiya Oyunlarının bürünc mükafatçısı, ukraynalı İqor Reyzlin kimi şpaqaçı 1/4 finalda mübarizəni dayandıraraq olimpiadadan kənarda qaldı”.

Təcrübəli mütəxəssis qadın sablyasında komanda növündə olimpiadaya lisenziya qazanmağa yaxın olduqlarını bildirib: “Perunun paytaxtı Limada keçirilmiş Dünya Kubokunda iştirakdan sonra bunu reallaşdırmağın çətin olacağını bilirdik. Burada çox böyük rəqabət var idi. Avropadan vəsiqə uğrunda İtaliya və Ukrayna kimi millilərlə mübarizə aparırdıq. İtaliya qılıncoynatmanın vətəni sayılır. Burada bu idman növünün qədim və güclü ənənələri var. Ukraynanın heyətində iki olimpiya mükafatçısı yer almışdı. Məncə, yalnız Olqa Xarlanın adını çəkmək kifayət edər. Döyüşkən heyətə malik olsaq da, məncə, sonda psixoloji baxımdan düzgün hazırlaşa bilmədik. Yekun sıralamaya baxanda, Çin, Yunanıstan, Almaniya və Polşa kimi güclü komandaları qabaqlamağı bacardığımızı görürük. Bu isə komadanın potensialından xəbər verir. Lakin istənilən halda, komanda növündə lisenziya şansından istifadə edə bilmədiyimizə görə üzgünəm”.

Ç.Mustafayev əsas medal ümidlərimizdən biri olan Anna Baştanın qadın sablyaçıların şəxsi yarışına yaxşı hazırlaşdığını, lakin turnirin gedişində zədələndiyini söyləyib: “Anna Avropa Olimpiya Təsnifat turnirinə çox yaxşı hazırlaşmışdı. Qrup mərhələsini də böyük inamla, mütləq qalibiyyətlə başa vurdu. Ardıcıl 5 qələbə qazandı. Bir sözlə, çox yaxşı start götürmüşdü. Lakin mövsümün gedişində olduğu kimi, sanki zədə onu təqib edir. Zədə səbəbindən polşalı Malqorzata Kozaczuk ilə görüşü davam etdirə bilmədi. Halbuki buna qədər dəfələrlə həm komanda, həm də şəxsi yarışda onu məğlub etmişdi. Onun digər ayağında, dizində və əzələsində olan zədəsinin müalicəsi ilə məşğul olsaq da, görüşün əvvəlində, hesabda irəlidə olarkən digər ayağından zədə aldı. Yəqin kadrlarda da görmüsünüz, idmançımız zədə alsa da, sonadək, ayaqda dayana bildiyi qədər mübarizə apardı. Hamımız məyusuq. Anna Başta Avropa çempionu, dünya çempionatının finalçısı olub. Mövsümün əvvəlində zədədən əziyyət çəksə də, yenidən optimal formasını yığmağa başlayırdı və son turnirdə zədə ilə bağlı bəxtsizlik olmasaydı, lisenziya qazanacağına böyük inam var idi”.