İngiltərə Premyer Liqası: Mudrık mükəmməl qolla “Çelsi”yə 3 xal qazandırıb

İngiltərə Premyer Liqasının 28-ci turu çərçivəsində “Çelsi” “Nyukasl”ı qəbul edib.

“Report” xəbər verir ki, Con Bruksun başçılıq etdiyi arbitrlər briqadasının idarə etdiyi oyun “Stemford Bric” stadionunda baş tutub.

Oyun fəal başlayan “Çelsi” hesabı erkən açıb: 6-cı dəqiqədə Kol Palmerin ötürməsindən sonra Nikolas Cekson fərqlənib. Birinci hissənin sonunda isə qonaqlar hesabı bərabərləşdiriblər: 43-cü dəqiqədə Aleksander İsak Premyer Liqada 12-ci qolunu vurub, ona məhsuldar ötürməni braziliyalı Brunu Gimaraynş edib.

58-ci dəqiqədə “zadəganlar”ın yarımmüdafəçisi Kol Palmer mükəmməl zərbə ilə qapıçı Martin Dubravkanı məyus edib. 76-cı dəqiqədə isə ukraynalı Mixaylo Mudrık “sağsağanlar”ın müdafiəsini yarıb qapıçını da geridə qoyaraq topu qapıya göndərib. Matçın 90-cı dəqiqəsində Ceykob Mörfi oyunda intriqanı bərpa etsə də, Eddi Haunun yetirmələrinin bundan artığına gücü çatmayıb: oyun meydan sahiblərinin 3:2 hesablı qələbəsi ilə başa çatıb.

Qeyd edək ki, bu qələbədən sonra argentinalı baş məşqçi Maurisio Poçettionun yetirmələri 11-ci pillədəki yerlərini bərkidərək “Nyukasl”la xal fərqini birə endiriblər. Komandaların müvafiq olaraq 39 və 40 xalı var. Bundan başqa, “Çelsi”nin ehtiyatında bir oyun var. “Zadəganlar”ın Premyer Liqada növbəti matçı martın 30-da evdə “Börnli”yə qarşı olacaq, “sağsağanlar” isə eyni gündə öz meydanlarında Londonun “Vest Hem”i ilə üzləşəcəklər.