Elvin Məmmədov: “Minifutbol üzrə Azərbaycan millisində oynamaq istərdim”

“Gələcəkdə minifutbol üzrə Azərbaycan millisində oynamaq istərdim”.

Bunu “Report”a açıqlamasında futbol üzrə Azərbaycan yığmasının sabiq üzvü Elvin Məmmədov deyib.

Cari mövsümdən minifutbol üzrə ölkə çempionatında iştirak edən “İnter”in heyətində yer alan 35 yaşlı oyunçu yığmada oynamaq arzusunu gizlətməyib: “Minifutbol mənim üçün yeni layihədir. Oradakı çıxışımı davam etdirəcəyəm. Ancaq milliyə düşmək üçün daha çox matçda iştirak etməliyəm ki, yaxşı forma yığım. Böyük futboldan sonra minifutbol millisində oynamaq mənim üçün şərəf olar”.

Elvin Məmmədov futbol üzrə II Liqada mübarizə aparan “Cəbrayıl”la anlaşmasına da aydınlıq gətirib. O, adıçəkilən komandanın baş məşqçisi Cavid Hüseynov amilinin bunda həlledici rol oynadığını söyləyib: “Futbola qayıtmağımın səbəbkarı Cavid Hüseynov oldu. Xahiş etdi ki, komandaya kömək olum. Özümdə güc varsa, dostuma niyə kömək etməyim? II Liqa həvəskar səviyyədə olduğu üçün həftədə bir dəfə oyun olur. Üstəlik, bir müddətdir böyük futboldan uzaq düşmüşəm. Bir məşqlə kifayətlənmək olmaz. Həftə ərzində bir dəfə II Liqada, bir dəfə də minifutbol çempionatında çıxış etsəm, daha yaxşı formada qalaram”.

Qeyd edək ki, Elvin Məmmədov 2008-2017-ci illərdə futbol üzrə Azərbaycan millisinin heyətində 38 oyun keçirib, 7 qol vurub. O, 2023-cü ilin yayında karyerasını başa vurub.