Nazim Əliyev: "Çempionatımızda yerli hücumçularla bağlı qıtlıq yaranıb, hazırda onlara güvən də yoxdur"

"Çempionatımızda yerli hücumçularla bağlı qıtlıq yaranıb, hazırda onlara güvən də yoxdur".

Bunu "QELEBE.AZ"a açıqlamasında "Neftçi" və "Qarabağ"ın sabiq futbolçusu Nazim Əliyev Azərbaycan Premyer Liqasının 2023/2024 mövsümünün ilk yarısında bombardirlik yarışında yerli forvardların olmamasına münasibət bildirərkən deyib.

183 qolla ölkə çempionatlarının tarixinə düşən 60 yaşlı keçmiş oyunçu klublarda əcnəbi hücumçuların çoxluq təşkil etdiyini bildirib: "Xarici komandalarda futbolçular transfer edəndə ilk növbədə ön xəttə nəzər yetirirlər. Sonra digər mövqelərə baxırlar. Burada əsas güc legionerlərin üzərinə düşür. Amma belə olmamalıdır. Premyer Liqadakı məşqçilər yerli hücumçulara da şans verməlidirlər. Digər mövqelərdə olduğu kimi, buna da nəzər yetirməliyik".

Əliyev ötən mövsümün bombardirləri - Ramil Şeydayev və Musa Qurbanlının hazırda ölkə xaricində çıxış etdiklərini və təcrübələrini artırdıqlarını söyləyib. O, bunun milli komandamız üçün yaxşı olduğunu vurğulayıb.

Azərbaycan çempionatları tarixinin ən sərrast forvardı "hazırda Premyer Liqada hansı yerli hücumçunu fərqləndirərdiniz" sualına isə bu cür cavab verib: "Məncə, indi kimsə yoxdur. Amma "Neftçi"də Rəhman Hacıyevi xüsusi qeyd edərdim. Hücumçu olmasa da, hər matçda ona şans verərdim. Meydana çıxır, qollarını vurur, komandasının qələbələrində pay sahibi olur".

Qeyd edək ki, "Qarabağ"ın braziliyalı oyunçusu Olavio Juninyo 13 qolla Azərbaycan Premyer Liqasında bombardirlərin siyahısına başçılıq edir. "Səbail"dən Aleksandr Ramalinqom (7 qol) ikinci, Yassin Benzia, Hamidu Keyta, Leandro Andrade (hamısı "Qarabağ"), Otto Con ("Turan Tovuz") 6 qolla növbəti sıralarda yer alıblar.