Avropa Oyunlarında medalı təmin edən Azərbaycan idmançısı: “Qələbəyə əmin idim”

“Rəqib görüşə çıxsaydı belə, özümə inanırdım, qələbə qazanacağıma əmin idim”.

“Report” xəbər verir ki, bunu Polşada təşkil olunan III Avropa Oyunlarında yarımfinala vəsiqə qazanaraq, minimum bürünc medalı təmin edən muay-tay üzrə Azərbaycan millisinin üzvü Emili Rzayeva jurnalistlərə açıqlamasında deyib.

Onun 63,5 kq çəki dərəcəsində 1/4 final mərhələsindəki rəqibi Nora Kornelli (Fransa) çəkiyə gəlmədiyi üçün E.Rzayeva qalib elan olunub. Onun sözlərinə görə, fransalı görüşə çıxsaydı belə, tam hazır idi.

Millinin üzvü karyerasında ilk dəfə qatıldığı Avropa Oyunlarında çempionluğu hədəfləyir: “Yarımfinal görüşündə də öz gücümü ortaya qoyacağam. Ümid edirəm ki, Azərbaycana qızıl medalla qayıdacağam. İlk Avropa Oyunlarım olsa da, özümə inanıram”.

Qeyd edək ki, Emili Rzayeva yarımfinalda çexiyalı Tereza Stekova ilə qarşılaşacaq. Görüş iyunun 26-da keçiriləcək.