İvan Brkiç: “Turan Tovuz”a ilk oyundakı məğlubiyyətin təsadüfi olduğunu göstərdik”

“Turan Tovuz”a ilk oyundakı məğlubiyyətin təsadüfi olduğunu göstərdik”.

“Report” xəbər verir ki, bunu “Neftçi”nin futbolçusu İvan Brkiç Azərbaycan Kubokunun yarımfinal mərhələsində “Turan Tovuz”la keçirilən oyun barədə ölkəsi Xorvatiya mətbuatına açıqlamasında deyib.

28 yaşlı qapıçı Tovuzda 0:1 hesabı ilə uduzmalarına baxmayaraq, cavab qarşılaşmasında qazandıqları 2:0 hesablı qələbəyə layiq olduqlarını bildirib: “İlk oyundakı məğlubiyyətdən sonra cavab görüşü asan olmadı. Ancaq daha dəyərli olduğumuzu bilirdik. Yaxşı hazırlaşdıq, sakit qaldıq. Bir qol vursaq, ardını gətirəcəyimizə inanırdıq. Sonda belə də oldu”.

Brkiç “Qəbələ” ilə keçiriləcək final matçında qələbə qazanmağa çalışacaqlarını söyləyib: “Final görüşü stadionumuzda olacaq. Əlbəttə ki, bu, bizə üstünlük verəcək. Hədəfimiz mövsümü kubokla başa vurmaqdır”.

Qeyd edək ki, “Neftçi” ilə “Qəbələ” arasında Azərbaycan Kubokunun final görüşü iyunun 3-də “Bakcell Arena”da keçiriləcək.