“Qarabağ” və “Sabah”ın futbolçuları dünyanın ən məhsuldar oyunçuları sırasına düşüblər
https://qelebe.az//uploads/photo/qarabag-ve-sabahin-futbolchulari-dunyanin-en-mehsuldar-oyunchulari-sirasina-dushubler.webp
Milli çempionatlarda 2022/2023 mövsümünün ən məhsuldar futbolçuları müəyyənləşib.
“QELEBE.AZ”un məlumatına görə, oyunçuların qol və məhsuldar ötürmə sayının cəminə əsasən hesablanan siyahıda Azərbaycan Premyer Liqasında çıxış edən iki oyunçu yer alıb.
Bunlar “Qarabağ”ın hücumçusu Musa Qurbanlı və “Sabah”ın qolçusu Coy-Lens Mikelsdir. Hər iki ön xətt oyunçusu çempionatın geridə qalan 28 turunda 25 qolda yaxından iştirak edib. Premyer Liqanın hazırkı bombardiri Qurbanlı 20 qol + 5 assistlə dünyanın ən məhsuldar 14-cü oyunçusudursa, Mikels 15+10-luq göstərici ilə 16-cıdır.
Onlar Harri Keyn, Neymar, Xviça Kvaratsxeliya, Kilian Mbappe, Robert Levandovski kimi dünya ulduzlarını geridə qoymağı bacarıblar. Müasir dövrün ən yaxşısı hesab edilən Lionel Messi isə Qurbanlı və Mikelsi cəmi 1 top qabaqlayır. Argentinalı cari mövsüm 13 qol, 13 məhsuldar ötürmə ilə yadda qalıb.
Siyahıya Lüksemburqun “Esperanj” klubunun üzvü Rayan Filipp başçılıq edir. O, ölkə birinciliyində meydana çıxdığı 19 qarşılaşmada 21 qol, 20 assistlə komandasına fayda verib. İngiltərənin “Mançester Siti” klubunun qolçusu Erlinq Holann 33 qolda yaxından iştirak etməklə ikinci sırada yer alır. Meksika klubu “Amerika”da oynayan Henri Martin isə 22+9-luq göstərici ilə üçüncüdür.
| Futbolçu | Klubu | Oyun | Qol | Assist | Cəmi | |
| 1 | Rayan Filipp | “Esperanj” | 19 | 21 | 20 | 41 |
| 2 | Erlinq Holann | “Mançester Siti” | 26 | 28 | 5 | 33 |
| 3 | Henri Martin | “Amerika” | 30 | 22 | 9 | 31 |
| 4 | Kodjo Fo Doh Laba | “Əl-Ayn” | 21 | 22 | 9 | 31 |
| 5 | Enner Valensiya | “Fənərbağça” | 22 | 26 | 4 | 30 |
| 6 | Marko Livaya | “Hayduk”, Split | 26 | 18 | 10 | 28 |
| 7 | Dominik Ştolz | “Esperanj” | 19 | 16 | 12 | 28 |
| 8 | Rayan Brobbel | TNS | 21 | 13 | 15 | 28 |
| 9 | Mateus Pato | “Borneo” | 30 | 23 | 3 | 26 |
| 10 | Viktor Osimxen | “Napoli” | 23 | 21 | 5 | 26 |
| 11 | David Da Silva | “Persib” | 30 | 21 | 5 | 26 |
| 12 | Lionel Messi | PSJ | 24 | 13 | 13 | 26 |
| 13 | Mayk Trezor | “Genk” | 31 | 8 | 18 | 26 |
| 14 | Musa Qurbanlı | “Qarabağ” | 25 | 20 | 5 | 25 |
| 15 | Omer Atzili | “Makkabi”, Hayfa | 26 | 16 | 9 | 25 |
| 16 | Coy-Lens Mikels | “Sabah” | 27 | 15 | 10 | 25 |
| 17 | Kodi Qakpo | “Liverpul” | 24 | 13 | 12 | 25 |
| 18 | Deyvid Sinani | “Düdelanj” | 18 | 13 | 12 | 25 |
