Premyer Liqa: "Kəpəz" autsayderi, "Zirə" "Neftçi"ni qəbul edəcək

Bu gün futbol üzrə Azərbaycan Premyer Liqasında XXVIII turun daha iki oyunu keçiriləcək.

"QELEBE.AZ"un məlumatına görə, günün ilk matçı Gəncədə "Kəpəz"lə "Səbail" arasında baş tutacaq.

Hazırda Qərb təmsilçisi 22 xalla 8-ci, Bakı klubu isə 18 xalla sonuncu - 10-cu pillədə qərarlaşıb. Komandalar indiyədək ölkə çempionatında 7 dəfə üz-üzə gəliblər. Bunların 2-də meydan sahibləri, 4-də qonaqlar qələbə qazanıblar. Bir görüş heç-heçə ilə başa çatıb. Topların nisbətində də "sarı-göylər" rəqibindən geri qalır - 9:11.

"Kəpəz" evdə ən azı 2 qol vurub. Gəncə təmsilçisinin meydanındakı matçlarda 3 və ya daha çox qol qeydə alınıb.

Günün digər matçında isə 56 xalla 3-cü sırada yer alan "Neftçi" 37 xalla 4-cü pillədə gedən "Zirə"nin qonağı olacaq. Komandalar arasında bunadək baş tutan 29 Premyer Liqa oyununda "qartallar"ın üstünlüyü nəzərə çarpır - 12 qələbə. "Ağ-qaralar" isə 10 qarşılaşmada rəqibini məğlub edib. 7 görüşdə bərabərlik qeydə alınıb. Qol sayında isə Laurentsiu Regekampfın baş məşqçi olduğu komanda öndədir - 33:28.

"Neftçi" son üç oyunda qalib gəlib. "Zirə" son 6 ev matçından yalnız birində qol vurmayıb.

AzərbaycanPremyerLiqası
XXVIII tur
1 aprel (şənbə)

15:30. "Kəpəz" - "Səbail"
Hakimlər: Tural Qurbanov, Vüsal Məmmədov, Şirmamed Mamedov, Kamal Umudlu
Hakim-inspektor: Munis Abdullayev
AFFA nümayəndəsi: Əsgər Əmirəliyev
Gəncə şəhər stadionu.

19:30. "Zirə" - "Neftçi"
Hakimlər: Nicat İsmayıllı, Kamran Bayramov, Cəmil Quliyev, Emin Əliyev
Hakim-inspektor: Barış Şimşek
AFFA nümayəndəsi: Ramiz Mustafayev
Zirə İdman Kompleksinin stadionu.

Qeyd edək ki, açılış oyununda "Sumqayıt" səfərdə "Turan Tovuz"u 3:2 hesabı ilə məğlub edib. Tura aprelin 2-də keçiriləcək "Şamaxı" - "Qarabağ" və "Sabah" - "Qəbələ" görüşləri ilə yekun vurulacaq.