İsveçli futbolçu: “Azərbaycanla oyunda qırmızı vərəqə almadığım üçün sevindim”

“Azərbaycanla oyunda qırmızı vərəqə almadığım üçün sevindim”.

“Report” xəbər verir ki, bunu İsveç yığmasının futbolçusu Viktor Dyekereş Azərbaycan millisini 5:0 hesabı ilə məğlub etdikləri AVRO-2024-ün seçmə mərhələ oyunu zamanı Emin Mahmudova qarşı kobudluq etdiyi epizodla bağlı danışarkən deyib.

Stokholmdakı qarşılaşmanın 24-cü dəqiqəsində top uğrunda mübarizə zamanı təpiklə Azərbaycan seçməsinin kapitanının qarnına vuran 25 yaşlı hücumçu fransalı hakimin qərarından razılıq bildirib: “İndiyə qədər heç vaxt oyun anında kiminsə qarnına təpiklə vurmamışam. Hakimin epizodu sarı vərəqə kimi görməsi gözəl idi. Ancaq topa müdaxilə etmək istəyərkən rəqibi görmürdüm. Düzü, VAR-a baxılmasından narahat idim”.

Qeyd edək ki, Viktor Dyekereş görüşün 79-cu dəqiqəsində İsveç seçməsinin 3-cü qoluna imza atıb.