"Mançester Siti" dünya çempionu ilə müqaviləni uzadır

İngiltərənin "Mançester Siti" klubu futbolçusu Xulian Alvareslə müqavilənin müddətini uzadacaq.

"Report" xəbər verir ki, bu barədə insayder Fabritsio Romano tviterdə bildirib.

Onun sözlərinə görə, 23 yaşlı hücumçunun yeni sözləşməsi 2028-ci ilin yayınadək nəzərdə tutulacaq.

"Şəhərlilər" argentinalı forvardın maaşını da artıracaq. Müqavilənin martın 14-də Almaniya "Leyptsiq"inə qarşı UEFA Çempionlar Liqasının cavab matçından sonra imzalanacağı gözlənilir.

Qeyd edək ki, Xulian Alvares ötən ilin əvvəlində "Mançester Siti"yə keçib. O, 2022-ci ildə Argentina millisi ilə Qətərdəki dünya çempionatının qalibi olub