“Qarabağ”ın istədiyi qapıçı Avropa Liqasının iştirak ərizəsindən çıxarılıb

Qış fasiləsində “Qarabağ”ın transfer gündəmində olan rusiyalı futbolçu Andrey Lunyov Almaniyanın “Bayer” klubunda UEFA Avropa Liqasının iştirak ərizəsindən çıxarılıb.

“QELEBE.AZ” xəbər verir ki, buna səbəb 32 yaşlı qapıçının zədədən əziyyət çəkməsidir.

Yanvarın sonuncu günündə belindən zədə alan Lunyovun nə zaman sağalacağı bəlli olmadığından, Bundesliqa təmsilçisi avrokuboklarda onun xidmətindən yararlanmamaq qərarına gəlib. “Bayer” Avropa Liqasının 1/8 final mərhələsində Macarıstanın “Ferentsvaroş” klubu ilə qarşılaşacaq. Oyunlar martın 9-da və 16-da keçiriləcək.

Qeyd edək ki, Andrey Lunyovun yanvarda “Qarabağ”a transferinin baş tutmamasının səbəblərindən biri qolkiperin tez-tez zədələnməsi olub.