Samir Abasov: “Bu cür oynasaq, Premyer Liqanı layiqli şəkildə tərk edəcəyik”

“Bu cür oynayaraq Premyer Liqanı tərk etsək, deməli, ona layiqik”.

“QELEBE.AZ”un məlumatına görə, bunu “Sumqayıt”ın baş məşqçisi Samir Abasov “Kəpəz”ə 1:2 hesabı ilə məğlub olduqları Azərbaycan Premyer Liqasının XXIV tur oyunundan sonra mətbuat konfransında deyib.

45 yaşlı mütəxəssis ilk dəqiqələrdən oyunlarının alınmadığını bildirib: “Bu cür start götürürsənsə, nəticə də belə olacaq. Düzdür, nə məndən əvvəl, nə də mənim dövrümdə həddən artıq yaxşı oyunlarımız olub. Ancaq bu, ən bərbad oyunumuz oldu. Layiqli şəkildə də uduzduq. Matçdan əvvəl danışdıqlarımız hara, meydandakı oyun hara. Rəqibin hansı vəziyyətlərdə qol vura bildiyini danışmışdıq. Amma “Kəpəz” yenə də həmin formada fərqləndi. Son 2-3 dəqiqəni saymıram. Bu, hər komandada olur. Öz meydanında ilk dəqiqələrdən ağırlığını qoya bilmirsənsə, məğlubiyyəti qəbul etməlisən”.

Baş məşqçi oyunçuların həvəssiz olmalarından şikayətlənib: “Adi ötürmələrlə qələbə qazanmağın mümkünlüyünü düşünürüksə, yanılırıq. Ustalığını ortaya qoymalısan. Bizim kimi komanda üçün ustalıqdan danışmaq yersizdir. Ustalığın da yoxdursa, ürəyini ortaya qoymalı, hər topa birinci atılmalısan. Həvəslə də oynamırsansa, nəticə belə olmalıdır. Bugünkü oyunla sonuncu yerdə olmağa layiqik”.

Samir Abasov son vaxtlar tez-tez səhvləri ilə diqqət çəkən qapıçı Aydın Bayramova da xəbərdarlıq edib: “Bu, rəqabətsizlikdən qaynaqlana bilər. Hər mətbuat konfransında qapıçı səhvindən danışırsan, amma hər matçda da qapında bu səhvlərdən qol buraxırsan. Adam karyerasını düşünməlidir. İkinci qolda böyük səhvi var idi. Bərbad oyunumuzu vurğulayırıq. Meydançada digərlərindən bir az normal oynayan da yoxdur. Qapıçı o səhvlərə yol verməsə, bəlkə heç-heçə etmək olardı. Səhvlər sıralandıqca bu cür əziyyətlər çəkirik. Bunun da bir sonu olacaq. Aydından tez özünə gəlməsini gözləyirəm. Bütün məşqçilərin arzusu hər mövqedə rəqabətin olmasıdır. Bizim klublarımızda isə bununla bağlı problem var”.