Humay Qafarova: “Naxçıvan gimnastları ilk dəfə milli komandanın üzvləri ilə birgə məşqə çıxırlar”

“Naxçıvan gimnastları ilk dəfə milli komandanın üzvləri ilə birgə təlim-məşq toplanışlarında iştirak edib, onlarla məşqə çıxırlar”.

Bunu “Report”a açıqlamasında Naxçıvan Muxtar Respublikasında gimnastika hamı üçün və bədii gimnastika növləri üzrə məşqçi Humay Qafarova deyib.

27 yaşlı məşqçi Milli Gimnastika Arenasında keçirdikləri təlim-məşq toplanışını dəyərləndirib.

O bildirib ki, Bakıya gəlməklərində məqsəd Naxçıvan gimnastlarının hazırlıq səviyyəsini artırmaq və qarşıdakı yarışlara daha ciddi hazırlaşmaqdır: “Naxçıvanda bədii gimnastika 2014-cü ildən fəaliyyət göstərir. Məşğələlərdə yaşı 3-dən 11-dək olan 100-ə yaxın uşaq iştirak edir. Dörd qrup şəklində olmaqla məşğələlərimiz olur. Azərbaycan Gimnastika Federasiyasının (AGF) dəstəyi sayəsində işlərimiz daha planlı, rahat şəkildə davam edir. Bakıya gəlməklə gimnastlarımız region mühitindən çıxaraq ölkəmiqyaslı fəaliyyət modeli ilə yaxından tanış oldular. Məşqçilərə və gimnastlara göstərilən diqqətə görə başda Azərbaycan Gimnastika Federasiyasının prezidenti Mehriban xanım Əliyeva olmaqla, AGF rəhbərliyinə, məşqçilərinə və hər bir üzvünə dərin minnətdarlığımı bildirirəm”.