Dəmiryolçular “Zəfər” kuboku uğrunda mübarizə aparır

Azərbaycan Dəmiryolçularının Müstəqil Həmkarlar İttifaqı Respublika Komitəsi (MHİRK) “Azərbaycan Dəmir Yolları” QSC (ADY) ilə birgə əməkdaşlıq çərçivəsində dəmiryolçuların “Zəfər” kuboku uğrunda idman yarışlarına start verib. Nabran qəsəbəsində yerləşən “Lokomotiv” İstirahət Mərkəzinin idman kompleksində baş tutan spartakiadada ADY-nin müxtəlif struktur bölmələrinin komandaları yarışır.

ADY-dan “APA-Economics”ə verilən məlumata görə, 13 oktyabr – dəmir yolu işçilərinin peşə bayramı ərəfəsində keçirilən kütləvi idman yarışlarının məqsədi ölkəmizdə bədən tərbiyəsi və idmanın daha da inkişaf etdirilməsinə, eləcə də sağlam həyat tərzinin təbliğ olunması istiqamətində aparılan işlərə töhfə verməkdir.

Ümumilikdə 300-dən çox dəmiryolçu futbol, minifutbol, voleybol, stolüstü tennis, şahmat və dama üzrə oyunlarda güclərini sınayır.

Sentyabrın 18-dək davam edəcək yarışların sonunda qaliblərə kubok, diplom və pul mükafatı təqdim ediləcək.