İqor Ponomaryov "Sabah"ın UEFA Avropa Liqasının I təsnifat mərhələsindəki potensial rəqiblərini dəyərləndirib

“Sabah”ın idman direktoru İqor Ponomaryov komandanın UEFA Avropa Liqasının I təsnifat mərhələsindəki potensial rəqiblərini dəyərləndirib.

O, "QELEBE.AZ"a açıqlamasında Ukraynanın "Şaxtyor" klubunun daha təcrübəli olduğunu vurğulayıb.

"Avrokuboklarda asan rəqib yoxdur. Potensial rəqiblərin hər birinin böyük təcrübəsi var. Əlbəttə, "Şaxtyor" digər potensial rəqiblərlə müqayisədə daha təcrübəli və tanınmışdır. Lakin rəqibin kimliyindən asılı olmayaraq, komanda meydana yalnız qələbə üçün çıxmalıdır. Bu, futboldur və ambisiyalar olmalıdır", - deyə klub rəsmisi bildirib.

Qeyd edək ki, paytaxt təmsilçisinin potensial rəqibləri "Şaxtyor” (Donetsk, Ukrayna), “Şerif” (Moldova), "Sele" (Sloveniya) və "Spartak"dır (Trnava, Slovakiya).

Raundun püşkatma mərasimi bu gün İsveçrənin Nyon şəhərində, Bakı vaxtı ilə saat 17:00-da başlayacaq. "Sabah" UEFA Avropa Liqasının I təsnifat mərhələsində ilk oyununu iyulun 10-da, cavab görüşünü isə 17-də keçirəcək.