Maksim Medvedev: “Macarıstana qalib gəlmək üçün milli üzvləri bacardıqlarını yüz faiz ortaya qoymalıdırlar”

Bu gün keçiriləcək yoldaşlıq görüşündə Macarıstana qalib gəlmək üçün Azərbaycan millisinin futbolçuları bacardıqlarını yüz faiz ortaya qoymalıdırlar.

Bunu “Report”a yığmanın sabiq kapitanı Maksim Medvedev deyib.

O, Macarıstan yığmasının açıq futbol oynayacağını düşünür:

“Macarıstanın heyətində daha səviyyəli futbolçular var. Ona görə də çox diqqətli, əzmkar, soyuqqanlı olmalıyıq. Bizim futbolçular da təcrübəlidirlər, əksəriyyəti Avropa səviyyəsində oynayıblar. Minimum səhv etsələr, meydanda bir-birilərini başa düşsələr, nəticə qazanmaq mümkün olacaq. Oyundan da çox şey asılıdır. Bəzən alınır, ortaya yaxşı nəticə çıxır. Bəzən də, rəqibin zəif olmasına baxmayaraq, oyun alınmır. Burada baş məşqçinin də rolu çox önəmlidir. Necə strategiya quracaq, futbolçuları hansı şəkildə oynadacaq... Oyunçular da məsuliyyətli olmalı, baş məşqçinin tapşırıqlarını yerinə yetirməli və qalib gəlmək üçün bacardıqlarını 100 faiz ortaya qoymalıdırlar”.

M.Medvedev mövqelər üzrə maksimum diqqətli olmağın vacibliyini bildirib:

“Macarıstan yığmasının son oyunlarına baxmamışam. Heç bilmirəm ki, hazırda heyətdə kimlər çıxış edir. Oynadığım dönəmlərdən bilirdim ki, həmişə ən yaxşı səviyyədə olan komandadır. Onlara qarşı oynamaq çox çətindir. Çünki fiziki cəhətdən güclü, sürətli, texnikalı futbolçuları var. Ona görə də hər epizodlarda, mövqelər üzrə diqqətli olmalıyıq. Çünki belə rəqibə bir az şans versən, boşluq buraxsan, səni cəzalandıracaq”.

Sabiq müdafiəçi iyunun 7-də Latviya ilə baş tutan yoldaşlıq görüşünün nəticəsini də səyərləndirib:

“Latviya ilə oyundan öncə heyətlərə və sistemə baxdım. Hər iki komandanın müdafiə futbolu seçdiyi görünürdü: biri 5-4-1, digəri 5-3-2 sisteminə üstünlük vermişdi. Komandalar bir-birindən bir az çəkinirdilər. Heç biri açıq futbol oynamağa risk etmirdi. Ona görə də oyun daha qapalı, intensivlik də aşağı idi. Yığmanın əsasən uzun ötürmələrə üstünlük verdiyini gördük. Ancaq bəzi tapşrıqlar qapalı oyun səbəbindən alınmırdı. Düzdür, qalib gələ bilərdik, amma heç-heçə oynadıq. Latviya millisi ilə heç-heçə sevindirici olmasa da, üzücü də deyildi. Çünki səfər oyunu idi”.

Qeyd edək ki, Azərbaycan - Macarıstan matçı bu gün “Liv Bona Dea Arena”da, saat 20:00-da start götürəcək. Fernandu Santuşun baş məşqçisi olduğu kollektiv iyunun 7-də səfərdə Latviya ilə yoldaşlıq matçında qolsuz heç-heçə edib.