Azərbaycan millisinin kapitanı: "Dünya çempionatına ən ciddi hazırlaşan bizim komanda idi"

Dünya çempionatına bəlkə də ən ciddi hazırlaşan bizim komanda idi. Bu da bəhrəsiz qalmadı.

Bunu "QELEBE.AZ"a açıqlamasında Bakıda keçirilən minifutbol üzrə dünya çempionatının qalibi olan Azərbaycan millisinin kapitanı Elvin Əlizadə deyib.

E.Əlizadə vurğulayıb ki, komanda minifutbol üzrə dünya çempionatına xüsusi hazırlaşıb:

“Hazırlıqlarımız çox ağır idi. Çox çalışırdıq”.

Onun sözlərinə görə, əldə olunan qələbə çəkilən zəhmətin, əziyyətin məqsədyönlü nəticəsi idi:

"İlk oyunlarda meydança amili performansımıza təsir edirdi. Təkcə bizə yox, bütün komandaların oyununda bu məqam rol oynayırdı. Amma sonra adaptasiya olunduq".

Kapitan həmçinin azarkeşlərin sevgisindən danışıb:

“Bu hörməti qazanmaq bizi çox sevindirir”.

Xatırladaq ki, Elşad Quliyevin rəhbərlik etdiyi Azərbaycan millisi minifutbol üzrə dünya çempionatının final matçında Macarıstan yığmasını məğlub edib. İyunun 1-də Milli Gimnastika Arenasında keçirilən qarşılaşma yığmanın 4:2 hesablı qələbəsi ilə yekunlaşıb.