Xəzər İsayev: "Azərbaycan beynəlxalq ədalətli oyunlar hərəkatı ilə bağlı proseslərdə fəal iştirak edir"

Azərbaycan beynəlxalq ədalətli oyunlar hərəkatı ilə bağlı proseslərdə fəal iştirak edir.

"Report" xəbər verir ki, bunu Azərbaycan Milli Olimpiya Komitəsinin (MOK) Ədalətli Oyunlar Komissiyasının sədri Xəzər İsayev bildirib.

O, 2024-cü ilin yekunlarına həsr olunan mükafatlandırma mərasimindən sonra jurnalistlərə açıqlamasında ölkədə ədalətli oyunlar baxımından yüksək adlara layiq insanlar olduğunu deyib:

"Ədalətli Oyunlar Komissiyası artıq uzun müddətdir fəaliyyət göstərir. Həm Beynəlxalq, həm də Avropa Ədalətli Oyunlar hərəkatının üzvüyük və bununla bağlı proseslərdə çox fəal iştirak edirik. Artıq Azərbaycanda ədalətli oyunlar baxımından yüksək adlara layiq insanlar var. Fəaliyyətimiz beynəlxalq təşkilatlar tərəfindən yüksək dəyərləndirilir. Bu il mən "Con Barotta" mükafatına layiq görüldüm. Mükafat bundan əvvəl mərhum nazirimiz Azad Rəhimova, həmçinin MOK-un vitse-prezidenti Çingiz Hüseynova təqdim olunmuşdu. Bu, karyera ilə bağlı Beynəlxalq Olimpiya Komitəsi tərəfindən təsis olunmuş mükafatdır.

X.İsayev planlara toxunub:

"Qaşım Maqomedovun mükafat alması Azərbaycanda aparılan ədalətli idman proseslərinin nəticəsidir. Həm idmançılarımız, həm hakimlərimiz, həm də mütəxəssislərimiz yüksək mükafatlar əldə edirlər. Bu işimizi davam etdirəcəyik. Mayın 19-da Dünya Ədalətli Oyunlar Günüdür. Bununla bağlı tədbirdə də Ədalətli Oyunlar Komissiyası olaraq iştirak edəcəyik".

Qeyd edək ki, bu gün MOK-un inzibati binasında ədalətli oyun prinsiplərinə sadiq bədən tərbiyəsi və idman xadimi nominasiyasında Azərbaycan Cüdo Federasiyasının prezidenti Rəşad Nəbiyev, ədalətli oyun prinsiplərinə sadiq idmançı nominasiyasında Qaşım Maqomedov (taekvondo), ədalətli oyun prinsiplərinə sadiq məşqçi nominasiyasında Tərlan Həsənov (cüdo), ədalətli oyun prinsiplərinə sadiq hakim nominasiyasında Emil Qurbanəliyev (boks) və ədalətli oyun prinsiplərinin ən yaxşı təbliğatçısı nominasiyasında "İctimai TV"yə mükafat təqdim olunub.