Azərbaycanın MMA döyüşçüsü: "Titul yarışından qopmamaq üçün Bakıda mütləq qələbə qazanmalıyam"

Azərbaycanın MMA döyüşçüsü Rafael Fiziyev Mütləq Döyüş Çempionatının (UFC) Bakıda təşkil olunacaq turnirində qələbəyə köklənəcək.

"Report"un məlumatına görə, o, bunu yarışdakı hədəfi ilə bağlı danışarkən deyib.

Xüsusi sessiyaya qoşulan 32 yaşlı idmançı Bakıda mübarizə aparacağı üçün heç bir təzyiq hiss etmədiyini söyləyib:

"Mübarizə apardığım ölkədən asılı olmayaraq, doğma publika hər zaman məni izləyir. Ardıcıl iki məğlubiyyət almışam. Titul yarışından qopmamaq üçün mütləq qələbə qazanmalıyam. Bu baxımdan bir az təzyiq var. Amma ən azından əminəm ki, mənim döyüşüm baxımlı alınacaq".

Qeyd edək ki, “UFC Fight Night” iyunun 21-də Bakı Kristal Zalında baş tutacaq. Rafael Fiziyev Çilidən olan İqnasio Bahamondeslə döyüşəcək.