"Qarabağ"ın prezidenti: Oyundan sonra futbolçuların hər birini qucaqladım

Oyundan sonra futbolçuların hər birini ayrı-ayrılıqda qucaqladım.

"Report" xəbər verir ki, bunu "Qarabağ"ın prezidenti Tahir Gözəl Misli Premyer Liqasının XXXII turunda "Sabah"la keçirilən oyundan (1:1) sonra jurnalistlərə açıqlamasında deyib.

Klub rəhbəri "köhlən atlar"ın 12-ci dəfə Azərbaycan çempionu olmasına münasibət bildirib: "İldən-ilə Azərbaycan çempionatının səviyyəsi qalxır. Komandamız da sübut etdi ki, illər ərzində gücünü qoruyub-saxlayır. Baxmayaraq ki, "Sabah"la matçın gedişində hesab 1:1 olarkən həyəcan keçirdik. Sevindirici haldır ki, sonluq bizim istədiyimiz kimi oldu.

Komandamızdan çox razıyıq".

Qeyd edək ki, "Sabah"la görüşdən sonra xallarının sayını 77-yə çatdıran Ağdam təmsilçisi Premyer Liqanın başa çatmasına 4 tur qalmış 12-ci Azərbaycan çempionluğunu rəsmiləşdirib.