Karlos Alkaras karyerası ərzində qazancı 40 milyon dolları keçən 11-ci tennisçi olub

“Böyük Dəbilqə” turnirlərinin 4 qat qalibi olan ispaniyalı Karlos Alkaras karyerası ərzində qazancı 40 milyon dolları keçən 11-ci tennisçi olub.

"QELEBE.AZ" xarici KİV-ə istinadən xəbər verir ki, bu, onun Monakoda keçirilən "Masters" turnirinin qalibi olmasından sonra reallaşıb.

21 yaşlı idmançı Monte Karloda təşkil olunan yarışda qalib gəldiyinə görə 1 milyon dollar qazanıb. Bununla da o, həm kişilər, həm də qadınlar arasında mükafat məbləği 40 milyon dolları keçən 11-ci tennisçi olub.

Qeyd edək ki, hazırda bu göstərici üzrə kişilər arasında lider “Böyük Dəbilqə” yarışlarının 24 qat qalibi, serbiyalı Novak Cokoviçdir (187 milyon dollar). Qadınlar arasında ən çox qazanan tennisçi isə 23 titul sahibi Serena Uilyamsdır (95 milyon dollar).