İngiltərədə "Mançester Siti"nin futbolçusunu yumruqlayan azarkeş həbs edilib

Azarkeş Alfi Holt İngiltərənin "Mançester Siti" klubunun yarımmüdafiəçisi Cek Qrilişin üzünə zərbə endirib. Hadisə İngiltərə futbol çempionatının 31-ci turunda "Mançester Yunayted"ə qarşı keçirilən matçdan sonra baş verib.

"Report"un məlumatına görə, bu barədə "Daily Mail" qəzeti xəbər verib.

Qarşılaşma aprelin altısında "Old Trafford" stadionunda keçirilib və komandalar 0:0 hesabı ilə heç-heçə edib. Qriliş meydana 74-cü dəqiqədə İlkay Gündoğanı əvəzləyərək çıxıb.

Nəşrin məlumatına görə, azarkeş və futbolçu arasında münaqişə tribuna altındakı otağa gedən yolda baş verib. 20 yaşlı Holt Qrilişə zərbə endirdiyinə görə həbs edilib.

Mənbənin məlumatına görə, azarkeşin məhkəməsi bu ilin iyul ayında Mançesterdə keçiriləcək. Klublar bu məlumatı şərh etməkdən imtina ediblər.

Qeyd edək ki, 29 yaşlı Qriliş 2021-ci ilin avqust ayından "Mançester Siti"də çıxış edir.

O, klub tərkibində ümumilikdə 154 oyun keçirib, 32 qol vurub və 41 məhsuldar ötürmə edib. "Mançester Siti" 31 tur keçirdikdən sonra 52 xal toplayaraq İngiltərə çempionatının turnir cədvəlində beşinci yerdədir. Komanda növbəti matçını aprelin 12- də evdə "Kristal Pelas"a qarşı keçirəcək.