Riçard Trautman: "Avropa çempionatından yaxşı nəticə ilə dönəcəyimizə ümid edirəm"

İdmançıların bəziləri olimpiadadan sonra istirahət etdilər. Zədələrin sağaldanlar var. Ümid edirəm ki, Avropa çempionatından yaxşı nəticə ilə dönəcəyik.

"Report"un məlumatına görə, bunu jurnalistlərə müsahibəsində kişi cüdoçulardan ibarət Azərbaycan millisinin baş məşqçisi Riçard Trautman deyib.

Almaniyalı mütəxəssis Monteneqronun paytaxtı Podqoritsada keçiriləcək Avropa çempionatı ilə bağlı fikirlərini bölüşüb:

"Neçə medal qazanacağımızı deyə bilmərəm. Cüdoda hər saniyənin öz hökmü var. Olimpiya çempionu 10 saniyəyə uduza bilər. Ən azı iki qızıl medal hədəfləyirik. Bu, üç və ya dörd də ola bilər. Digər növlərdən fərqli olaraq cüdoda proqnoz vermək çətindir".

O, Azərbaycan təmsilçilərinin rəqiblərini təhlil etdiklərini bildirib:

"Avropa çempionatına qitənin ən yaxşıları gələcəklər. Rusiyanın, Gürcüstanın və Fransanın da belə idmançıları var. Hər bir idmançını fərdi olaraq hazırlayırıq".

O, 90 kq-da çıxış edəcək cüdoçunun daha sonra bəlli olacağını xatırladıb:

"Elcan Hacıyev gənc idmançıdır. Zədəsini yeni sağaldıb. O vaxt Avropa çempionu olması sürpriz deyildi. Bu dəfə Turan Bayramovdan və Ruslan Paşayevdən də qızıl medal gözləyirəm. Sürpriz edə bilərlər. Amma çətin olacağını bilirəm".

Qeyd edək ki, Avropa çempionatı aprelin 23-dən 27-dək təşkil olunacaq.